قعدة المصطبة | الأرقام في العامية المصرية | أصل الاستخدام

للأرقام في العامية المصرية إستخدامات مختلفة ومحددة جدا… بمعني إن لوصف كل حالة او شخص او شيء رقم محدد يستخدم حسب الحالة، وعلي سبيل المثال:
-(٦٠).. يستخدم رقم (٦٠) فقط وحصريا دونا عن باقي الأرقام في الشتيمة، زي (ابن “٦٠” كلب).. ومفيش حاجة ابدا اسمها (ابن “٥٠” كلب) ولا (ابن “٧٠” كلب) هما ٦٠! اما لو حد بشع جدا بقي وعايزين نضاعفله الشتيمة اضعاف كتيرة، فا بنعمل ايه؟ لا مش بنقول رقم اكبر من ٦٠ وخلاص.. لأ! احنا بنجيب ال٦٠ بتاعتنا عاااادي ونضربها في ٧٠! (ابن “٦٠×٧٠).. وبالهنا والشفا.
-يستخدم رقم (٦٠) بردو لوصف اسوأ مكان او وجهة.. (اهو غار في “٦٠” داهية).. وعمر ما حد غار في ٨٠ داهية مثلا ابدا! ماحصلتش!
-يستخدم رقم (٣٠) حصريا بردو لوصف شخص او شيء عديم المنفعة.. ( ده واد مالهوش “٣٠” لزمة) (روحت خروجة مالهاش “٣٠” لزمة) والملفت للنظر، ان مفيش اي حاجة في الدنيا لها ٣٠ لزمة اصلا! يعني العين مثلا بكل عظمتها واعجازها ده مالهاش ٣٠ لزمة! هو النظر او الابصار وشكرا!
-تستخدم في العامية (١٠٠ ١٠٠) لوصف الحالة الجيدة.. (انا تمام يا معلم الحمدلله وكله “١٠٠ ١٠٠”) او (لا آكل ايه تاني؟ انا كده “١٠٠ ١٠٠”)
-اما (١٠ علي ١٠) فتستخدم لوصف جودة الاشياء.. (شوية شاي”١٠ علي ١٠”)
-يستخدم رقم (١٠٠٠) تحديدا في مناسبات ثابتة..
-في المباركة.. (١٠٠٠ مبروك).. مفيش ١٠٠ مبروك مثلا!
-في الاحتفال الحماسي.. (١٠٠٠ نهار ابيض).. بردو مفيش (١٠ نهارات بيض) مثلا، ولا حتي(مليون نهار ابيض).. هما ألف في كل حتة!
-في الترحاب.. (١٠٠٠ خطوة عزيزة).. ودي بالنسبة لي جملة مبهمة جدا!يعني (دي خطوة عزيزة) بمعني انها زيارة نادرة الحدوث! انما (دي ١٠٠٠ خطوة عزيزة) يعني ألف زيارة نادرة الحدوث ازاااي؟؟؟
-وطبعا لما نحب نشكر حد اوي، بنشكره(١٠٠٠ شكر) بالعدد!
-يستخدم رقم (٧) في وصف حاجة غريبة جدا الحقيقة، وهي اللوصة او الانهاك المحير.. (ده انا دوخت ال(٧) دوخات لحد ما لقيتك!)
-كما يستخدم رقم (٧) للتعبير عن النوم العميق.. (مش هايرد عليك! ده شكله رايح في “سابع” نومة)..علي اساس انه لو في سادس نومة كان قام عادي وكده!
-توت الشاي بيبقي (٥٠ة).. خمسينة! اي ٥٠٪؜ من الحجم المعتاد الكوباية! نص كوباية يعني بالمللي!
-(٥).. هي وحدة قياس فضفاضة جدا، وتعني في العامية المصرية (خمس دقايق)، وتستخدم في وصف الانتظار احيانا (استناني (٥)).. او في وصف حوار سريع.. (هاكلمك (٥) بس اشرحلك).. او لوصف الاستراحة.. (اقعد (٥) بس خد نفسك)
-في وصف الوقت.. الثانية بتبقي (واحدة).. (ثانية “واحدة” بس البس الجزمة وانزللك) بس الدقيقة تحتمل (١) و(٢) و(٣).. (دقيقة “واحدة” وهابقي معاك)… او.. (اديني “دقيقتين” وهابقي معاك).. او.. (انا هاشرحلك كل حاجة في “٣” دقايق)
-واطول مدة زمنية في الكون هي (الساعتين الاتنين).. (قعدت تحكي لي “ساعتين” عن ابنها اللي بدأ يسنن !) بينما اقصر كلام هو اللي يتقال في (كلمتين اتنين) -(هما “كلمتين” ورد غطاهم)
-لما حد بيهدد بالعنف والبطش الشديد .. بيقول انه (هايطلّع “٣” ميتين ام) الشخص اللي بيهدده! ٣ بالتحديد! ولا ٢ ولا ٤! الراجل عارف هو بيقول ايه!
-الشخص المحتاس ده بقي اللي تلاقيه قاعد (يضرب اخماس في اسداس).. ودي بالنسبة لي عملية معقدة جدا جدا.
-واللي مالوش عند حد حاجة.. محدش يقدر يقول له (تلت التلاتة كام؟) اللي هو (١) عادي! محدش يقدر يقول له (١) ليه مش فاهم؟ طب وبعدين انا اصلا اقول له الفزورة دي ليه يعني؟ ايه الهدف يعني! مالهاش حوالي ٢٥..٣٠ لزمة يعني! حاجة في الحدود دي!